မြစ်ကြီးနား တပ်ကုန်းဒုက္ခသည် စခန်းတွင် ရေနှင့် အိမ်သာအခက်ခဲရှိ

 

ဗန်းမော်ခရိုင် KIO နယ်မြေ NHKAWNG PA ဒုက္ခသည်စခန်း

မြစ်ကြီးနား၊ ကချင်ပြည်နယ် — ကချင်ပြည်နယ် မြစ်ကြီးနားမြို့ တပ်ကုန်းရပ်ကွက်ရှိ စစ်ရှောင်စခန်းများတွင် ရေတွင်းနှင့် အိမ်သာမလုံလောက်သော အခက်ခဲများရင်ဆိုင်နေရကြောင်း ဒုက္ခသည်စခန်း တာဝန်ခံမှသိရသည်။

တပ်ကုန်းရပ်ကွက်ရှိ ဂါလီလဲစစ်ရှောင်စခန်းတွင် ရေတွင်းတစ်ခုကိုသာ အားလုံးပေါင်းပြီး အသုံးပြုနေရာ ထိုစခန်းတွင် လူဦးရေထပ် တိုးလာကာ ရေမလုံလောက်မှုဖြစ်နေကြောင်း သိရသည်။

“အရင်ကရေတွင်း ၂ခုရှိတော့အဆင်ပြေနေသေးတယ်။ လူထပ်တိုးမှ ရေဘုံဘိုင်တစ်ခုလည်း ပြန်ပျက်သွားတယ်။ ရေတိုင်ကီက မကြီးတော့အမြဲပြည့်အောင် မဖြည့်ထားနိုင်ဘူး။ မီးကပုံမှန် မလာတော့ ရေတိုင်ကီထဲဖြည့်ဖို့မလွယ်ဘူး” ဟု ဂါလီလဲ စခန်းမှတာဝန်ခံ ဦးထိန်ဆန်းကပြောသည်။

၎င်းကဆက်ပြီး စခန်းများတွင် အိမ်သာ မလုံလောက်သော အခက်ခဲလည်းရှိနေဆဲဖြစ်သည်ဟု ဆက်ပြောသည်။

“အိမ်သာမလောက်ဘူးလို့ပြောရမှာပေါ့၊ ကလေးတွေက အိမ်သာအပြင်မှာ သွားနေကြဆဲ အဆင့်ဆိုတော့။ ဒါပေမဲ့အိမ်သာကိုတော့ World Concern အဖွဲ့ အကူအညီနဲ့ ၂လုံးပြန်ပြီးလုပ် ဖို့တော့ပြင်နေတယ်” ဟု စခန်းတာဝန်ခံကပြောသည်။

ဂါလီလဲ စစ်ရှောင်စခန်းတွင် စုစုပေါင်းလူဦးရေ (၁၄၀) ယောက်ရှိပြီး အိမ်ထောင်စု (၃၁) စုရှိကြောင်း သိရသည်။

မြစ်ကြီးနားရှိ စစ်ရှောင်စခန်းအားလုံးတွင် ရေတွင်းနှင့်အိမ်သာမလုံလောက်သော အခက်အခဲများသည် စခန်းတိုင်းလိုလို၌ ဖြစ်နေကြောင်း ဒုက္ခသည်စခန်းများမှ သိရသည်။

ထိုသို့ ရေနှင့် အိမ်သာမလုံလောက်ပြဿနာသည် တကိုယ်ရေသန့်ရှင်းမှုနှင့် ပတ်ဝန်းကျင်သန့်ရှင်းမှု နည်းပါးလာကာ ကျမ်းမာရေးထိခိုက်စေနိုင်သည်ဟု ဒုက္ခသည်စခန်းရှိကျမ်းမာရေးဌာနမှဆိုသည်။

အဆိုပါစစ်ရှောင်စခန်းရှိ လူငယ်အချို့သည်လည်း ငွေအခက်ခဲဖြစ်နေသောကြောင့် ၀င်ငွေရရန် စခန်းအပြင်သို့ထွက်ကာ အလုပ်ရှာလိုနေကြသည်။

သို့သော်စခန်းလုံခြုံရေးအရ အပြင်သို့ ခရီးထွက်ကာ ငွေရှာခွင့်တားဆီးထားသောကြောင့် နေ့စားအလုပ်ဖြင့် လိုအပ်သော အသုံးဆောင်ပစ္စည်းများဝယ်ယူရန် အခက်ခဲဖြစ်နေသည်ဟု လူငယ်များက ပြောသည်။

“နေ့စားအလုပ်က ရှားတယ်။ တစ်နေ့လုံး မြတ်ခုတ်သန့်ရှင်းရေးလုပ်မှ ၃ ထောင်ပဲရတယ်။ ဒီအလုပ် ကပုံမှန်မရှိပြန်ဘူး။ စခန်းထဲမှာ မိန်းကလေးတွေဆိုဘာမှတောင်မလုပ်နိုင်ဘူး။ လူငယ်တွေအတွက် စဉ်းစားပေးစေချင်တယ်” ဟု ဂါလီလဲ စခန်းမှအသက် ၂၄ အရွယ်ခန့်လူငယ်တစ်ယောက်ကပြောသည်။

တပ်ကုန်းရပ်ကွက်တွင် စစ်ရှောင်စခန်း ၃ ခုရှိပြီး လူဦးရေ ၆၀၀ ခန့်ရှိသည်။ ယခု ရေနှင့် အိမ်သာ အခက်ခဲရောက်နေသော စခန်းများသည် ဂါလိလဲ ဒုက္ခသည်စခန်းအပါအ၀င် မြစ်ကြီးနားမြို့ အလယ်ကုန်း ရပ်ကွက် (မလိယန်) ဒုက္ခသည်စခန်း၊ ဂျန်မိုင်ကောင်ရပ်ကွက် ကက်သလစ်စခန်း၊ ကျွန်းပင်သာ ရပ်ကွက် ဒုက္ခသည်စခန်းများဖြစ်ကြောင်းသိရှိသည်။

အစိုးရထိန်းချုပ်နယ်မြေ များရှိ ဒုက္ခသည်စခန်းတွင် ဆက်လက်၍ အကူညီများ လိုအပ်နေဆဲဖြစ်ပြီး မြို့နယ်အသီးသီးရှိ စစ်ရှောင်စခန်းနှင့်ပတ်သက်၍ တာဝန်ခံများ အစည်းအဝေးပြုလုပ်ရာတွင် အစိုးရမဟုတ်သော အဖွဲ့အစည်းများ၏ ထောက်ပံ့မှု ပုံမှန်မရရှိသေးသောကြောင့် မိုးကောင်းမြို့နယ်စစ်ရှောင်စခန်းများတွင် အစားအသောက်ခက်ခဲမှုများနှင့် ဝိုင်းမော်မြို့နယ် စစ်ရှောင်စခန်းများတွင် ထင်းများခက်ခဲနေဆဲဖြစ်သည်ဟု ပြောဆိုခဲ့သည်။

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Group