အစိုးရနှင့် KIO ထပ်မံတွေ့ဆုံမည့် ကိစ္စ အဆင်သင့် မဖြစ်သေး

မြန်မာအစိုးရ နဲ့ KIO ကိုယ်စားလှယ်များ။

ကချင်လွတ်မြောက်ရေးအဖွဲ့(KIO)နှင့် ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီများ ဧပြီလ ၁၀ ရက်မတိုင်ခင် ပြန်လည်တွေ့ဆုံရန် ပြောဆိုထားသော်လည်း တွေ့ဆုံမည့်ကိစ္စကို ယခုချိန်ထိ အဆင်သင့် မဖြစ်သေးကြောင်း KIO ကပြောသည်။

KIO နှင့် အစိုးရ မတ်လ ၁၁ တရုတ်နိုင်ငံ ရွှေလီမြို့ တွေ့ဆုံဆွေးနွေးစဉ် ထိုသို့သဘောတူထားခြင်းဖြစ်သော်လည်း ညှိနှိုင်းစရာများရှိနေသေးသောကြောင့်ဖြစ်သည်ဟု KIO ပြောရေးဆိုခွင့်ရှိသူ ဒု-အထွေထွေအတွင်းရေးမှူး-၂ ဆလန်ကဘား လာနန် ကပြောသည်။

 “ဒီဧပြီလ ၁၀ ရက်အတောအတွင်း သင်္ကြန်မတိုင်ခင်မှာ တွေ့ရအောင်ဆိုပြီး သူတို့အနေနဲ့ပြောတာတော့ ဟုတ်တယ်။ ဒါပေမဲ့ အခုချိန်ထိတော့ ရက်အတိအကျမသတ်မှတ်သေးဘူး။ ဘယ်မှာတွေ့မယ်ဆိုတဲ့နေရာလည်း မဆုံးဖြတ်ရသေးဘူး။ တခြားဆွေးနွေးတိုင်ပင်စရာ တွေရှိသေးတဲ့အတွက်ကြောင့် အခုချိန်ထိ ဘာမှ မဆုံးဖြတ်ရသေးဘူး”

တွေ့ဆုံမှုများကို ညှိနှိုင်းဆောင်ရွက်နေချိန်တွင် အစိုးရဘက်မှ နယ်မြေရှင်းလင်းရေးဆိုသည့် ခေါင်းစဉ်ဖြင့် စစ်ဆင်ရေးလှုပ်ရှားမှုများ ဆက်လက်ပြုလုပ်နေသောကြောင့် မမျှော်လင့်ပဲ တိုက်ပွဲများ ဖြစ်ပွားလာသည်ဟု ဆလန်ကဘား လာနန် ကပြောသည်။

“သူတို့က စစ်အင်အားလျှော့သွားတာမရှိဘူး။ အလှဲအလှယ်လုပ်တာနဲ့ လူသစ်လာတိုးချထားတာတွေက ဆက်တိုက်ကိုလုပ်နေတယ်။ KIA စခန်းတွေနဲ့ ၁ မိုင်လောက်ပဲဝေးတဲ့နေရာကနေ တစ်နေ့ကို နည်းနည်း ရွှေ့ရွှေ့ပြီးတော့ နေရာယူပြီး လာနေသွားတယ်။ ဒီလိုမျိုး လှုပ်ရှားတာတွေရှိတဲ့အတွက်ကြောင့် ဘယ်လိုမှ ရှောင်လွှဲမရလို့ ပစ်ခတ်တာတွေဖြစ်လာတယ်။ အဲလိုမျိုးဖြစ်တာတွေရဲ့ ပြသနာ အစက သူတို့အစိုးရတပ်ဖွဲ့တွေ ဆက်ပြီးလှုပ်ရှားနေတယ်။ သူတို့ ခေါင်းစဉ်က နယ်မြေရှင်လင်းရေးဆိုတာဟုတ်တယ်။ ဒါပေမဲ့ တစ်ဖက်မှာတော့ အဲဒါက စစ်ဆင်ရေးလှုပ်ရှားမှုဖြစ်တယ်။ အဲဒါကြောင့် မျှော်လင့်မထားတဲ့နေရာတွေမှာ မမျှော်လင့်ပဲ ပစ်ခတ်တာ တွေဖြစ်လာတယ်”

ထို့ပြင်ဆွေးနွေးမှုတဖက်တွင် အစိုးရတပ်မှ KIO ထိန်းချုပ်နယ်မြေများတွင် လမ်းဖောက်လုပ်နေသည်ဟုဆိုကာ လှုပ်ရှားမှုများကိုတွေ့ရှိရပြီး အဆိုပါကိစ္စသည် ယခုအခြေအနေအရ ထိုသို့ပြုလုပ်ရန်မသင့်တော်ကြောင်း ပြည်ထောင်စု ငြိမ်းချမ်းရေးဖော်ဆောင်ရေး လုပ်ငန်းကော်မတီထံ အကြောင်းကြားထားပြီးလည်းဖြစ်သည်ဟု ဦးလာနန်က ဆက်ဆိုသည်။

“သူတို့ဘက်က အရင်က လမ်းမကောင်းတဲ့နေရာမှာ စစ်တပ်ကနေ လမ်းဖွင့်ဖို့ စီစဉ်တာတွေရှိတယ်။ သူတို့ဆက်သွယ်ရေးလေနော်။ စစ်ပြန်ဖြစ်လာရင်ဆိုပြီးလုပ်တာလား ဘယ်အချိန်အတွက်လဲ။ အဲဒါက လုပ်လို့မဖြစ်ဘူး။ မလုပ်သင့်ဘူး။ ဒီလို ရှေ့တန်းနေရာတွေမှာ အရမ်းစိုးရိမ်ရတဲ့အချိန်မှာ စစ်တပ်ကနေပြီး စစ်ဆင်ရေးလှုပ်ရှားမှုတွေမှာ အကျိုးရှိအောင် အသုံးချဖို့အတွက် လမ်းဖောက်တာမျိုးတွေ မလုပ်ရင်ကောင်းတယ်။ အဲလိုမျိုး ရပ်ထားရင်ကောင်းတယ်ဆိုပြီး ကျနော်တို့ စာနဲ့အကြောင်းကြားထားပြီးသားဟုတ်တယ်။ အဲဒီမှာ သူတို့ဆက်ပြီး လုပ်လာမယ်ဆိုရင်တော့ သူတို့လုပ်လာတဲ့အပေါ်မှာ လိုက်ပြီး တိုက်ပွဲက ရှောင်လို့မရတဲ့ အခြေအနေဖြစ်လာမယ်”

ကချင်လွတ်မြောက်ရေးအဖွဲ့(KIO) နှင့် မြန်မာအစိုးရတို့သည် ပြီးခဲ့သည့် မတ်လ (၁၁-၁၂) တွင် တရုတ်နိုင်ငံရွှေလီမြို့ တွေ့ဆုံဆွေးနွေးခဲ့ပြီးနောက် နှစ်ဖက်တပ်များ ယနေ့ထိ တိုက်ပွဲ ၇ ကြိမ်ထက်မနည်း ဖြစ်ပွားခဲ့သည်ဟု ဆိုသည်။

အဆိုပါ ရွှေလီဆွေးနွေးမှုတွင် အစိုးရနှင့် KIO သည် စစ်ရေးလျှော့လာရေး နှစ်ဖက် တပ်ပိုင်းဆိုင်ရာ အောက်ခြေတပ်ဖွဲ့များအထိ ညှိနှိုင်းမှုရရှိအောင် ညွန်ကြားသွားရန် သဘောတူခဲ့ကြခြင်းဖြစ်သည်။

သို့သော် ယခုချိန်ထိ ရှမ်းပြည်မြောက်ပိုင်း KIA တပ်မဟာ ၄ နယ်မြေနှင့် ပန်ဝါဘက်တို့တွင် အစိုးရနှင့် KIA ကြား တိုက်ပွဲများဆက်တိုက်ဆိုသလို ဖြစ်ပွားနေခြင်းဖြစ်သည်။

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Group