ဝိုင်းမော်မြို့နယ် နှစ်ခြင်းဖွံ့ဖြိုးရေးခြံရှိ ဒုက္ခသည်များ ထမင်းချက်ရန် ရှို့ထင်းခက်ခဲနေ

ဝိုင်းမော်မြို့နယ် တရုတ်နယ်စပ်ရှိ ဒုက္ခသည်များကို အစားအသောက် အကူညီပေးနေတဲ့ KBC အဖွဲ့။

ကချင်ပြည်နယ် ၀ိုင်းမော်မြို့နယ်ရှိ မြစ်ကြီးနား၊ မုန်နာ၊ ဝိုင်းမော် ကချင်နှစ်ခြင်း ခရစ်ယာန်ဖွံ့ဖြိုးရေးခြံများတွင် ခိုလှုံနေသော စစ်ပြေးဒုက္ခသည်များသည် ထမင်းချက်ရန်ထင်းနှင့် လျှပ်စစ်မီးများ အခက်ခဲဖြစ်နေကြောင်းသိရသည်။

၎င်းဒုက္ခသည်များတွင် ထင်းနှင့် မီးအခက်ခဲကြောင့် နေ့စဉ်ထမင်းချက်ရန်အတွက် အခက်ခဲများ ရင်ဆိုင်နေရကြောင်း ဒုက္ခသည်စခန်းမှ ပြောသည်။

ထင်းများအသုံးပြုရန်လိုအပ်နေသောကြောင့် ကချင်နှစ်ခြင်းခရစ်ယာန်အဖွဲ့ချုပ် (KBC) မှ အဟာရအတွက် ၁ လလျင် ၁ ဦးကို ကျပ် ၆၀၀၀ ထောက်ပံ့ပေးထားသောငွေကို ဒုက္ခသည်များက ထင်းများဝယ်ယူနေရကာ ထိုကဲ့သို့ ရေရှည် ခက်ခဲလာလျင် ဒုက္ခသည်စခန်းတွင်အခက်ခဲပိုမို ဆိုးရွားလာနိုင်ကြောင်း စခန်းမှဆရာတဦးပြောသည်။

“အစကအတူအတူပေါင်းချက်စားတယ် အဲချိန်တော့ ထင်းက နည်းနည်းက်သာတယ်။ အခုက ကိုယ့်ဖာသာကိုယ် ချက်စားတော့ ထင်းပြဿနာက နေ့တိုင်းဘဲရင်ဆိုင်နေရတယ်။ ကိုယ့်အခန်းကိုယ် ကိုယ့်မိသားစုတွေနဲ့ချက်စားတာ”

ရာသီဥတုပူပြင်းချိန် ၎င်းဒုက္ခသည်စခန်းတွင် လျပ်စစ်မီးမရရှိပဲ ဖရောင်းတိုင်မီးဖြင့်သာ နေရခြင်းကြောင့် စခန်းအတွင်း မီးဘေးအန္တရာယ်များကိုလည်း စိုးရိမ်နေရကြောင်း ဒုက္ခသည်စခန်းမှတာဝန်ရှိသူများ ပြောသည်။

၎င်းဒုက္ခသည်စခန်းတွင် အိမ်ခြေ ၇၀၀ ခန့် ရှိပြီး လူဦးရေ ၁၄၂၀ ခန့်ရှိသော စခန်းဖြစ်ပြီး သောက်ရေများလည်း နေ့စဉ်သုံးရန် လုံလောက်မှုမရှိကြောင်း စခန်းမှသိရသည်။

“အစက ဒုက္ခသည်တွေအတွက် ရေတွင်း ၁ ခုပဲရှိတယ် နောက်ပြီး ၂ ခုပြန်တူးတယ် ခုထပ်တူးနေကြတယ်။ နွေရာသီဆိုတော့ ရေတွေက ခက်ခဲတာတွေနေရှိတယ်” ဟု ဒုက္ခသည်စခန်းမှ ဆရာခေါင်ဒေါင် KNG ကချင်သတင်းဌာနသို့ပြောသည်။

၎င်းဒုက္ခသည်စခန်းတွင် ခိုလှုံနေသော ဒုက္ခသည်များသည် ဝိုင်းမော်မြို့နယ်၊ အင်ဂျန်းယန်မြို့နယ်၊ ဂျီဖွေမြို့နယ်၊ ဖားကန့်မြို့နယ်၊ ဗန်းမော်မြို့နယ်များမှ ဖြစ်ပြီး ၂၀၁၂ ဇွန်လမှ မုန်နာ- ဝိုင်းမော်နယ် ကချင်နှစ်ခြင်းခရစ်ယာန် ဖွံ့ဖြိုးရေးခြံ တစုပြီးတစု ပြောင်းရွှေ့လာခြင်း ဖြစ်သည်။

ဝိုင်းမော်နယ်နှစ်ခြင်းအသင်းတော်တွင် ဒုက္ခသည် ၆၀ ကျော်ခန့်ကျန်ရှိနေပြီး ၎င်းဒုက္ခသည်များသည်  ဧပြီလဆန်းပိုင်းတွင် ထိုဖွံ့ဖြိုးရေးခြံသို့ ရွေ့ပြောင်းမည်ဖြစ်ကြောင်း ဒုက္ခသည်စခန်းမှပြောသည်။

ဝိုင်းမော်နယ်နှစ်ခြင်းဖွံ့ဖြိုးရေးခြံတွင် နှစ်ခြင်းခရစ်ယာန်အသင်းတော်မှ ကျန်းမာရေးနှင့် ပတ်သက်ပြီး ပညာပေးခြင်း အစီစဉ်များ အသက်မွေးဝမ်းကျောင်းပညာများ ပြုလုပ်ပေးနေကြောင်း သိရသည်။

နှစ်ခြင်းခရစ်ယာန်အသင်းတော်တွင် ဒုက္ခသည်ကလေးငယ်များ မူကြိုမှ ၈ တန်းထိ ကျောင်းသားများ ၁၀၀ ကျော်ရှိပြီး ယခုနှစ်တွင်လည်း ဒုက္ခသည်ကလေး ပိုများလာနိုင်ကြောင်းသိရသည်။

www.kachinnews.com
www.burmese.kachinnews.com
www.kahcin.kachinnews.com
www.kachin-news.blogspot.com
http://www.facebook.com/Kachin-News-Group